Tuesday, June 18, 2013

Aks


Kuch lakeeren kheenchte kagaz par
ek tasveer numaaya hui
Laga koi apna hai, pehchaan waala
bichhda hua ghamkhawar koi

Uski aankhon mein apna maazi dikh rha tha mujhe
Uski khushboo guzre waqt ka ehsaas dila rahi thi
Uske wujood se mukamal lag rha tha jahan saara
Bohot der sochta raha, dekhta raha main usko

Achanak woh tasveer bol uthi
Suni sunai lag rahi thi aawaaz uski
Baaton mein guzre maazi ka aks dikh raha tha
Ghanton guftagoo karta raha main us se
Woh bhooley bachpan ki kahani suna rahi thi mujhe

Tera zikr aate hi aankh bhar aayi uski
Kuch aisi barsaat hui ki sab lakeeran dhundla gayi
Main khamosh bas dekhta reh gaya
Yeh soch kar ki aansu ponchh doon uske,
Main uski hasti hi mita baitha

Aaj bhi ussi kagaz ko dekhta rehta hoon,
Dhoonta rehta hoon aks koi
Shayad fir kuch numaaya ho jaye kahin
Fir koi le jaye mujhko guzre waqt mein

Fir koi haal-e-dil sun le mera..